ខន​សឺត​ទីក្រុង​អង្គរ​លើក​ដំបូង​ចូល​រួម​ដោយ​សិល្ប​ករ​លំដាប់​អន្តរ​ជាតិ

ដោយ ៖ កោះឯករាជ្យ

ថ្ងៃ អាទិត្យ ទី ៣០ ខែ មករា ឆ្នាំ ២០១១

កុមារី​បុស្បា ប៉ាន់ អ្នក​ចំរៀង​​សំលេង​គ្រលួច ​វ័យ​១៣​ឆ្នាំ ដែល​កំពុង​ល្បី​ឈ្មោះ​ទាំង​ក្នុង និង​ក្រៅ​ប្រទេស ខន​សឺត​ទីក្រុង​អង្គរ​លើក​ដំបូង​ចូល​រួម​ដោយ​សិល្ប​ករ​លំដាប់​អន្តរ​ជាតិ

(​រូបថត អ៊ុយ​សុង​)

កុមារី​បុស្បា ប៉ាន់ អ្នក​ចំរៀង​​សំលេង​គ្រលួច ​វ័យ​១៣​ឆ្នាំ ដែល​កំពុង​ល្បី​ឈ្មោះ​ទាំង​ក្នុង និង​ក្រៅ​ប្រទេស

រាជ​ធានី​ភ្នំពេញ ៖ ខន​សឺត​ទីក្រុង​អង្គរ​លើក​ដំបូង គឺ​ជា​ព្រឹត្តិ​ការណ៍​ប្រវត្តិ​សាស្ត្រ​នៅ​ខាង​មុខ​ប្រាសាទ​បាយ័ន ខេត្ត​សៀម​រាប នា​ថ្ងៃ​ទី​២៥-​២៦ ខែ​កុម្ភៈ ខាង​មុខ​ ដោយ​មាន​ការ​ចូល​រួម​ពី​សិល្ប​ករ សិល្ប​ការិនី​លំដាប់​អន្តរ​ជាតិ ក្នុង​នោះ​សំរាប់​ប្រទេស​កម្ពុជា គឺ​​​មាន​វត្ត​មាន​កុមារី​បុស្បា ប៉ាន់ អ្នក​ចំរៀង​​សំលេង​គ្រលួច ​វ័យ​១៣​ឆ្នាំ ដែល​កំពុង​ល្បី​ឈ្មោះ​ទាំង​ក្នុង និង​ក្រៅ​ប្រទេស​។ តាម​ការ​ឱ្យ​ដឹង​ពី​អ្នក​គ្រប់​គ្រង​កម្ម​វិធី​​ថា ខន​សឺត​លំដាប់​អន្តរ​ជាតិ​ក្នុង​ទឹកដី​កម្ពុជា​ព្រះ​រាជា​ណាចក្រ​អច្ឆិរយ​​ នេះ មាន​ការ​ចូល​រួម​ពី​ភ្ញៀវ​មក​ពី​ទីក្រុង​ប៉ារីស ហុងកុង សៀងហៃ កូឡា​ឡាំពួរ ​និង​សហ​រដ្ឋ​អាមេរិក។

គេ​រំពឹង​ថា ប្រាសាទ​បាយ័ន​នឹង​មាន​ជីវិត​រស់​រវើក​ជា​មួយ​នឹង​សូរ​សំលេង​កង​រំពង និង​ពន្លឺ​ដ៏​ឆើត​ឆាយ​នៃ​ការ​រចនា​ឆាក​សំដែង​​នោះ។ ដោយ​ឡែក​ផ្ទាំង​ប៉ាណូ​ធំ​ៗ​ស្តីពី​ការ​ប្រគំ​តន្ត្រី​ថ្ងៃ​ទី​២៥-​២៦ ខែ​កុម្ភៈ ត្រូវ​បាន​គេ​ដាក់​តាំង​នៅ​តាម​វិថី​ជា​ច្រើន​​នៅ​រាជ​ធានី​ភ្នំពេញ​ និង​ខេត្ត​សៀម​រាប ក្រោម​ប្រធាន​បទ «ព្រះ​គុណ​ គ្រូ​អង្គរ» ដែល​មាន​រូប​បុស្បា ប៉ាន់ មួយ​កំណាត់​ខ្លួន​ពាក់​មួក​យ៉ាង​ធំ​។

លោក​ប៉ាន់ ម៉េង​ហ៊ាង ជា​ឪពុក​បុស្បា ប៉ាន់ ​ប្រាប់​អ្នក​សារ​ព័ត៌​មាន​ថា លោក​ចង់​ឃើញ​វត្ត​មាន​សិល្ប​ករ សិល្ប​ការិនី​កម្ពុជា​លើ​ឆាក​​ប្រគំ​តន្ត្រី​ខ្នាត​អន្តរ​ជាតិ​លើ​ពិភព​លោក​ នា​រយៈ​ពេល​៤ ឬ​៥​ឆ្នាំ​ខាង​មុខ។ លោក​មាន​ជំនឿ​ថា បុស្បា ប៉ាន់ អាច​ធ្វើ​ទៅ​បាន​ដោយ​សារ​ទេព​កោសល្យ​ពី​ធម្ម​ជាតិ​របស់​នាង រួម​ទាំង​ការ​ខិតខំ​ឧស្សាហ៍​ព្យាយាម​ ​និង​ការ​បង្ហាត់​បង្រៀន​ពី​គ្រូ​សិល្បៈ​ជាតិ និង​អន្តរ​ជាតិ។

លោក​បន្ត​ថា ក្រុម​ភ្លេង​ខុស​ៗ​គ្នា​ចំនួន​៥​ទំរង់ រួម​ទាំង​ក្រុម​តន្ត្រី​មក​ពី​ហុង​កុង ក្រុម​ភ្លេង​ពិណ​ពាទ្យ ក្រុម​មហោរី ​ក្រុម​​ស្គរ​ហ្សាស និង​ក្រុម​តន្ត្រី​ក្លាស៊ិក​សំលេង​ស្រាល នឹង​មក​សំដែង​ក្នុង​ខន​សឺត​នោះ។ មុន​នឹង​ការ​ប្រគំ​តន្ត្រី​នឹង​មាន​ការ​លេង​ភ្លេង​ និង​ច្រៀង​ថ្វាយ​បង្គំ​អាទិ​ទេព​ក្រុង​អង្គរ​ចំនួន​១១​បទ​​នៅ​ល្ងាច​ថ្ងៃ​ទី ​២៤ កុម្ភៈ។ ការ​ប្រគំ​ភ្លេង​បែប​នេះ គឺ​ជា​លើក​ទី១​សំរាប់​ប្រទេស​កម្ពុជា​​​ក្នុង​រយៈ​ពេល​៤០​ឆ្នាំ​មក​នេះ។ ការ​រៀបចំ​ឆាក​តន្ត្រី​នៅ​ទីក្រុង​អង្គរ​​នេះ​ គឺ​មាន​អ្នក​ជំនាញ​មក​ពី​បរ​ទេស​ជា​អ្នក​ជួយ​រៀបចំ​ ដើម្បី​ឱ្យ​ព្រឹត្តិ​ការណ៍​នេះ​មាន​ភាព​អស្ចារ្យ។

កុមារី​បុស្បា ប៉ាន់ បាន​ប្រាប់​អ្នក​សារ​ព័ត៌​មាន​ថា នាង​​ហ្វឹក​ហាត់​រយៈ​ពេល៦​ខែ​​មុន​ចាប់​ផ្តើម​​ប្រគំ​តន្ត្រី​ដ៏​ធំ​នេះ ហើយ​នាង​នឹង​ប្រឹង​ឱ្យ​អស់​ពី​សមត្ថ​ភាព ដើម្បី​ធ្វើ​ឱ្យ​ព្រឹត្តិ​ការណ៍​ខន​សឺត​អន្តរ​ជាតិ​នេះ​កាន់​តែ​មាន​​ភាព​ អស្ចារ្យ​ថែម​ទៀត។
សំរាប់​សំបុត្រ​ចូល​ទស្សនា​ខន​សឺត​នេះ គឺ​មាន​លក់​នៅ​ Monumen Books ហាង​កាហ្វេ​សង់​ទីម៉ង់ ភោជនីយ​ដ្ឋាន​យីស៊ាន ភោជនីយ​ដ្ឋាន​ម្លិះ និង​ឡាក់គី​ស្ទ័រ។ ចំណែក​នៅ​ខេត្ត​សៀម​រាប​សំបុត្រ​មាន​លក់​នៅ​វិចិត្រ​សាល​ម៉ាក​ដឺម៉ុត Momument Boosk និង​ឡាក់គី​ស្ទ័រ ឬ​អាច​ទិញ​បាន​តាម​ក្រុម​ហ៊ុន​ទេស​ចរណ៍​មួយ​ចំនួន​តាម​រយៈ​វ៉េប​សាយ www.bosbapanh.com។ គេ​រំពឹង​ថា ព្រឹត្តិ​ការណ៍​នៃ​ការ​ប្រគំ​តន្ត្រី​នោះ​នឹង​ទទួល​បាន​ការ​គាំទ្រ​ពី​ភ្ញៀវ ​ជាតិ និង​អន្តរ​ជាតិ ហើយ​ក៏​ជា​វេទិកា​ទាក់​ទាញ​ភ្ញៀវ​ទេស​ចរ​បរ​ទេស​ផង​ដែរ៕



0 comments:

Post a Comment

Related Posts Plugin for WordPress, Blogger...
Twitter Delicious Facebook Digg Favorites More