ថ្ងៃ ព្រហស្បតិ៍ ទី ១០ ខែ កុម្ភៈ ឆ្នាំ ២០១១
រាជធានីភ្នំពេញ ៖ នាងខាត់ សុឃីម ក្នុងវ័យ៣១ឆ្នាំ ជាតារាកំប្លែង ជាតារាចំរៀងប្រពៃណី និងជាអ្នកកាន់ឧបករណ៍ភ្លេងខ្មែរ តាខេ ទ្រ និងឃឹម ។ នាងមានកេរិ៍្តឈ្មោះល្បីទាំងក្នុងព្រះរាជាណាចក្រកម្ពុជា និងនៅក្រៅប្រទេស ហើយកន្លងមកធ្លាប់ចេញទៅសំដែងនៅសហរដ្ឋអាមេរិក បារាំង កាណាដា ជប៉ុន អូស្ត្រាលី ញូវហ្សឡែន និងបណ្តាប្រទេសមួយចំនួនទៀតដែលមានបងប្អូនខ្មែរយើងរស់នៅ ។ ក្នុងឆ្នាំ២០១១នេះនាងខាត់ សុឃីម ត្រៀមខ្លួនចេញទៅសំដែងនៅប្រទេសកាណាដា និងអូស្ត្រាលី តែមិនទាន់ដឹងថា ចេញទៅនៅពេលណាទេ ។
ទន្ទឹមនឹងទទួលជោគជ័យ ក្នុងអាជីពសិល្បៈកន្លងមកនាងខាត់ សុឃីម ជួបប្រទះពាក្យចចាមអារ៉ាមអាស្រូវជាច្រើនដូចជាថា នាងជាប់ពាក់ព័ន្ធស្នេហាជាមួយលោកចា រិទ្ធី និងថាមានកូនជាមួយគ្នាទៀតផង។ ប៉ុន្តែពាក្យចចាមអារ៉ាមនោះត្រូវនាងបដិសេធន៍មិនទទួលទេ ។ នាងនិយាយថា កូនប្រុសរបស់នាងឈ្មោះស្កាយគឺនាងបានទិញមេជីវិតមកចាក់បង្កើត។
នៅថ្ងៃទី៨ កុម្ភៈ ឆ្នាំ២០១១ អ្នកយកព័ត៌មានកោះសន្តិភាពបានទូរស័ព្ទជួបសំភាសន៍នាងនៅពេលកំពុងថត កម្មវិធីដើមភូមិចុងភូមិរបស់ស្ថានីយទូរទស្សន៍អាស៊ីអាគ្នេយ៍ ។ នៅពេលផ្តើមសំនួរថា តើនាងលែងលះពីលោកចា រិទ្ធី ហើយឬយ៉ាងណា? នាងឆ្លើយយ៉ាងលឿនថា «រឿងចាស់សុំមិននិយាយទេ បើចង់សំភាសន៍នាងខ្ញុំសុំនិយាយតែរឿងថ្មីព្រោះថា នាងខ្ញុំគ្មានជាប់ពាក់ព័ន្ធអ្វីជាមួយលោកចា រិទ្ធី នោះទេ ។ ពេលនេះនាងខ្ញុំសូមប្រកាសថា ជិតរៀបការជាមួយលោកផាណូ អាយុ២៦ឆ្នាំ ដែលជាអ្នកសិល្បៈសំដែង និងច្រៀង និងជាពិធីករប្រចាំស្ថានីយទូរទស្សន៍ខ្មែរប៉ុសិ៍្តលេខ៩ហើយ» ។ នាងខាត់ សុឃីម បន្តថា នៅក្នុងខែកុម្ភៈ ឆ្នាំ ២០១២ នាងនឹងរៀបការហើយ ។ នាងបញ្ជាក់ពីទំនាក់ទំនងស្នេហារបស់នាងជាមួយលោកផាណូថា នាងនិងលោកបានស្គាល់គ្នាច្រើនឆ្នាំហើយ ប៉ុន្តែមិនមានទំនាក់ទំនងស្នេហាទេ គឺទើបតែប៉ុន្មានខែចុងក្រោយក្នុងចុងឆ្នាំ២០១០ និងដើម ឆ្នាំ២០១១នេះ ដុះពន្លកស្នេហ៍ឡើងរហូតសំរេចចិត្តថានឹងរៀបមង្គលការជាមួយគ្នា នាខែកុម្ភៈ ឆ្នាំ២០១២ ។ បច្ចុប្បន្នគេសង្កេតឃើញនាងខាត់ សុឃីម បណ្តើរកំលោះសង្ហាវ័យក្មេងជាតារារួមអាជីពជាញឹកញាប់មិនថា ក្នុងឬក្រៅរង្វង់សិល្បៈទេ រួមដំណើរជាមួយគ្នាយ៉ាងស្អិតរមួត ហាក់បីដូចជាប្តីប្រពន្ធ៕
0 comments:
Post a Comment