រាជធានីភ្នំពេញ ៖ នាដការបាំបុរាណមកពីសាកលវិទ្យាល័យភូមិន្ទវិចិត្រសិល្បៈគឺកញ្ញា សួស វីហ្សា បានក្លាយជាអ្នកចំរៀង និងជាតារាសំដែងកាយវិការខារ៉ាអូខេប្រចាំផលិតកម្មរ៉ុក។ មិនត្រឹមតែមានរូបសម្ផស្សស្រស់ស្អាតទេ នាងថែមទាំងមានទេពកោសល្យសំដែងល្អ និងមានទឹកដមសំលេងពីរោះរណ្តំចិត្ត។ កន្លងមកគេតែងតែឃើញនាងឡើងច្រៀងជាកិត្តិយសនៅ លើឆាកប្រគំតន្ត្រីចុងសប្តាហ៍តាមស្ថានីយទូរទស្សន៍នានាគ្រប់កម្ម វិធី ។ ក្នុងវ័យ២០ឆ្នាំកញ្ញាសួស វីហ្សា មានស្រុកកំណើតនៅភ្នំពេញក្នុងសង្កាត់ស្រះចក ខណ្ឌដូនពេញ ។ នាងមានបងប្អូន៣នាក់ ក្នុងនោះប្រុសម្នាក់ ចំណែករូបនាងជាកូនទី២។ កន្លងមកនាងបានចូលហាត់រៀនរាំរបាំបុរាណនៅសាកលវិទ្យាល័យភូមិន្ទ វិចិត្រសិល្បៈអស់រយៈពេល៤ឆ្នាំ ។ នាងធ្លាប់រាំរបាំបុរាណជាមួយសិស្សរួមថ្នាក់ក្នុងកម្មវិធីជាតិ ផ្សេងៗជាច្រើនលើក និងធ្លាប់ចេញទៅសំដែងរបាំនៅក្រៅប្រទេសបាន២លើក គឺលើកទី១ ទៅប្រទេសបារាំង និងលើកទី២នៅប្រទេសសិង្ហបុរី។
កញ្ញាសួស វីហ្សា និយាយថា មុនក្លាយជាអ្នកចំរៀងនាងធ្លាប់ប្រឡងច្រៀងក្នុងកម្មវិធីចំរៀង សម័យ-បុរាណនៅស្ថានីយទូរទស្សន៍បាយ័នជាប់ចំណាត់ថ្នាក់លេខ១។ ក្រោយមកនៅឆ្នាំ២០០៩ នាងបានចូលប្រលងច្រៀងក្នុងកម្មវិធី Rock Star ជាប់ចំណាត់ថ្នាក់លេខ១ ហើយត្រូវផលិតកម្ម Rock ជ្រើសរើសឱ្យថតសំលេងចូលសីុឌីតាំងពីពេលនោះមក។
កញ្ញាសួស វីហ្សា និយាយថា តាំងពីក្លាយជាអ្នកចំរៀងមក នាងធ្លាប់ទទួលការគាំទ្រពីប្រិយមិត្តទស្សនិកជនតាមរយៈបទ«កំលោះ ភូមិខ្ញុំ» បទ«ស្ម័គ្រទាំង អស់ស្មោះតែមួយ» និងបទ«ទឹកភ្នែកក្នុងខ្យល់»ជាដើម ។ ក្នុងឆ្នាំ២០១១នេះនាងកំពុងត្រៀមចេញបទថ្មីៗទៀតនៅផលិតកម្មរ៉ុក ដែលជាបទឌីស្កូញ័រញាក់កន្ត្រាក់អារម្មណ៍លាយឡំ និងបទមនោសញ្ចេតនា ៕
0 comments:
Post a Comment